us ka KHayal chashm se shab KHwab le gaya
qasme ki ishq ji se mere tab le gaya
kin nindon ab tu soti hai ai chashm-e-girya-nak
mizhgan to khol shahr ko sailab le gaya
aawe jo mastaba mein to sun lo ki rah se
waiz ko ek jam-e-mai-e-nab le gaya
ne dil raha baja hai na sabr o hawas o hosh
aaya jo sail-e-ishq sab asbab le gaya
mere huzur shama ne girya jo sar kiya
roya main is qadar ki mujhe aab le gaya
ahwal us shikar zubun ka hai jae rahm
jis na-tawan ko muft na qassab le gaya
munh ki jhalak se yar ke behosh ho gae
shab hum ko 'mir' partaw-e-mahtab le gaya
Ghazal
Us ka KHayal chashm se shab KHwab le gaya
Mir Taqi Mir