umr sari yunhi guzari hai
din kisi ke hain shab hamari hai
kah rahi hai ye sham-e-tanhai
aaj ki raat hum pe bhaari hai
do-ghaDi pyar ki karen baaten
dil jalane ko umr sari hai
kuchh parinde faza mein uDte hain
kuchh parindon pe KHauf tari hai
jaise sahra mein ek shajar tanha
hum ne yun zindagi guzari hai
apna shewa mohabbaten karna
aage marzi 'hasan' tumhaari hai
Ghazal
Umr sari yunhi guzari hai
Hasan Rizvi