Umr-e-abad se KHizr ko be-zar dekh kar

umr-e-abad se KHizr ko be-zar dekh kar
KHush hon fusun-e-nargis-e-bimar dekh kar

kya jalwa-gah-e-hasrat-e-nazzara hai bahisht
hairan hun surat-e-dar-o-diwar dekh kar

baada ba-qadr-e-zarf sahi rasm-e-mai-kada
saqi nazakat-e-dil-e-mai-KHwar dekh kar

ab justuju-e-dost ki manzil kahin bhi ho
hum chal paDe hain rah ko dushwar dekh kar

shayan-e-jurm-e-ishq na thi qaid-e-zindagi
ji shad ho gaya rasan-o-dar dekh kar

ab is se kiya gharaz ye haram hai ki dair hai
baiThe hain hum to saya-e-diwar dekh kar

ab hashr tak hijab-nashin hai nigah-e-shauq
chhupna tha rang-e-hasrat-e-didar dekh kar

raaz-e-farogh-e-aKHir-e-shab kuchh na khul saka
kyun KHush hai shama subh ke aasar dekh kar

saz-e-ghazal uTha hi liya hum ne ai 'rawish'
is chashm-e-nim-baz ka israr dekh kar