ulTe sidhe gire paDe hain peD
raat tufan se laDe hain peD
kaun aaya tha kis se baat hui
aansuon ki tarah jhaDe hain peD
baghban ho gae lakaDhaare
haal pucha to ro paDe hain peD
kya KHabar intizar hai kis ka
sal-ha-sal se khaDe hain peD
jis jagah hain na Tas-se-mas honge
kaun si baat par aDe hain peD
konplen phul pattiyan dekho
kaun kahta hai ye kaDe hain peD
jit kar kaun is zamin ko gaya
parchamon ki tarah gaDe hain peD
apni duniya ke log lagte hain
kuchh hain chhoTe to kuchh baDe hain peD
umr bhar raston pe rahte hain
shaeri par sabhi paDe hain peD
maut tak dosti nibhate hain
aadmi se bahut baDe hain peD
apna chehra nihaar len rutwen
aainon ki tarah jaDe hain peD
Ghazal
UlTe sidhe gire paDe hain peD
Suryabhanu Gupt