ulfat ke imtihan mein aghyar fail nikle
the pas ek hum hi jo jaan pe khel nikle
tegh-o-sinan ko rakh do aankhen laDao hum se
achchhi hai wo laDai jis mein ki mel nikle
dekha jo nur us ka to khul gai hain aankhen
duniya-o-din ke jhagDe bachchon ka khel nikle
ummid nekiyon ki rakkho na tum buron se
mumkin nahin khali se hargiz jo tel nikle
kab kohkan se uTTha koh-e-giran se ulfat
in saKHtiyon ko 'kaifi' kuchh hum hi jhel nikle
Ghazal
Ulfat ke imtihan mein aghyar fail nikle
Dattatriya Kaifi