udas raat ka dukh jaanta koi bhi na tha
meri tarah use pahchanta koi bhi na tha
sab apne qad ko sanobar samajh rahe the wahan
mere wajud ko gardanta koi bhi na tha
wo jis ki lash saDak par paDi hui thi kal
us ek shaKHs ko pahchanta koi bhi na tha
sab apni dhun mein magan apni fikr mein gum the
nasihaton ko meri manta koi bhi na tha
main ajnabi tha wahan sab ke waste 'asad'
tere nagar mein mujhe jaanta koi bhi na tha
Ghazal
Udas raat ka dukh jaanta koi bhi na tha
Asad Badayuni