tumhaare ghar se pas-e-marg kis ke ghar jata
batao aap se jata to main kidhar jata
nahin hai koi bhi sathi tumhaare mujrim ka
pukar uThte sab aaza jo main mukar jata
ajal ke bhes mein meri talash kar lete
wo aap DhunD ke KHud late mein jidhar jata
takallufat-e-mohabbat ne qaid kar rakkha
har ek samt thi diwar main kidhar jata
kabhi na samne aata zalil kahla kar
jo wo bulate to main apne nam par jata
bhala chhupae se chhupta lahu shahidon ka
ye KHun bol hi uThta jo tu mukar jata
'munir' fazl jo karta musabbab-ul-asbab
main karbala-e-mualla mein jald gar jata
Ghazal
Tumhaare ghar se pas-e-marg kis ke ghar jata
Muneer Shikohabadi