tum se ruKHsat-talab hai mil jao
koi ab jaan-ba-lab hai mil jao
lauT kar ab na aa saken shayad
ye masafat ajab hai mil jao
dil dhaDakte hue bhi Darta hai
kitni sunsan shab hai mil jao
is se pahle nahin hua tha kabhi
dil ka jo haal ab hai mil jao
KHwahishen be-sabab bhi hoti hain
kya kahen kya sabab hai mil jao
kaun ab aur intizar kare
itni mohlat hi kab hai mil jao
Ghazal
Tum se ruKHsat-talab hai mil jao
Shabnam Shakeel