tum ne ab sikh liya mujh ko satae rakhna
ek mahshar sa mere dil mein uThae rakhna
aisa karna ki mere nam ko dil par likh kar
parda-e-zehn ko tauqir dilae rakhna
main bhi rakkhunga tumhein soch ke shanon pe sawar
tum bhi sine se meri aas lagae rakhna
phir utarna hai mujhe KHwab ki gahrai mein
tum nigahon mein koi rah banae rakhna
muntazir aankh ko mayus na hone dena
KHud ko ummid ke raste pe biThae rakhna
jaane kab phir se palaT aaun tumhaari KHatir
phul ehsas ke gulshan mein khilae rakhna
apni aankhon ka diya meri jabin par rakh kar
nam apna meri qismat mein jagae rakhna
Ghazal
Tumne ab sikh liya mujhko satae rakhna
Naqqash Abidi