Tumko hum KHak-nashinon ka KHayal aane tak

tum ko hum KHak-nashinon ka KHayal aane tak
shahr to shahr badal jaenge virane tak

dekhiye mahfil-e-saqi ka natija kya ho
baat shishe ki pahunchne lagi paimane tak

us jagah bazm saqi ne biThaya hai hamein
hath phailaen to jata nahin paimane tak

subh hoti nahin ai ishq ye kaisi shab hai
qais o farhad ke dohra liye afsane tak

phir na tufan uThenge na giregi bijli
ye hawadis hain gharibon hi ke miT jaane tak

main ne har-chand bala Talni chahi lekin
shaiKH ne sath na chhoDa mera mai-KHane tak

wo bhi kya din the ki ghar se kahin jate hi na the
aur gae bhi to faqat sham ko mai-KHane tak

main wahan kaise haqiqat ko salamat rakkhun
jis jagah radd-o-badal ho gae afsane tak

baghban fasl-e-bahaar aane pe wada to qubul
aur agar hum na rahe fasl-e-bahaar aane tak

aur to kya kahun ai shaiKH teri himmat par
koi kafir hi gaya ho tere mai-KHane tak

ai 'qamar' sham ka wada hai wo aate honge
sham kahlati hai taron ke nikal aane tak

ai qamar subh hui ab to uTho mahfil se
shama gul ho gai ruKHsat hue parwane tak