tum ek aise shaKHs ko pahchante ho ya nahin
jis ka chehra bolta hai aur lab goya nahin
subh ko dekha to do ghaw mere chehre pe the
raat kuchh rone ki KHwahish thi magar roya nahin
phailta jata hai KHud-raw sabza-e-gham chaar-su
khet wo kaTunga jo main ne kabhi boya nahin
KHwab dekha tha koi bachpan ki kachchi nind mein
dosto phir chain se main aaj tak soya nahin
zinat-e-malbus-e-hasti baDh gai jis dagh se
zindagi bhar main ne aise dagh ko dhoya nahin
Ghazal
Tum ek aise shaKHs ko pahchante ho ya nahin
Murtaza Birlas