Tujhi se dad-e-wahshat len tujhi ko mehrban kar len

tujhi se dad-e-wahshat len tujhi ko mehrban kar len
junun-e-shauq mein jo chahen hum ai aasman kar len

jo aae dil mein sab jazb-e-nigah-e-na-tawan kar len
hum arz-e-shauq se pahle na un ko raaz-dan kar len

shikasta saz chheDen apni aankhen gul-fishan kar len
wo aaen ya na aaen hum to bazm-araiyan kar len

meri nazron mein KHak-e-ashiyan bhi aashiyan hogi
jinhen hai bijliyon ka KHauf fikr-e-ashiyan kar len

talafi kuchh na kuchh ho jae taklif-e-tabassum ki
zara Thahro hum apne damanon ki dhajjiyan kar len

hawa-e-garm kuchh mohlat de in masum ghunchon ko
ki thoDi der to nazzara-e-rang-e-jahan kar len