tujh se ab dard ka rishta bhi nahin chahiye hai
ja mujhe teri tamanna bhi nahin chahiye hai
dekh kuchh bhi na sakun main kisi sae ke siwa
raushni itni ziyaada bhi nahin chahiye hai
ek nazar tishna-e-nazzara hi rakh leni hai
ek tamashe mein tamasha bhi nahin chahiye hai
KHair-o-shar donon mujhe zaKHm diye jate hain
ye bura kya mujhe achchha bhi nahin chahiye hai
ab zara chahiye tanhai mein yaksui mujhe
ab koi chahne wala bhi nahin chahiye hai
main ne halkan kiya jis ki talab mein KHud ko
sach to ye hai ki wo duniya bhi nahin chahiye hai
rok mat mujh ko farastada-e-tughyani hun
us safar mein hun ki rasta bhi nahin chahiye hai
jina mushkil to bahut hai teri is duniya mein
lekin is KHwab ko marna bhi nahin chahiye hai
Ghazal
Tujhse ab dard ka rishta bhi nahin chahiye hai
Maqsood Wafa