tujh ko dekha to ye laga hai mujhe
ishq sadiyon se jaanta hai mujhe
aashna saDken ajnabi chehre
shahr mein aur kya dikha hai mujhe
log qimat meri lagate hain
kis jagah tu ne rakh diya hai mujhe
subh ruKHsat kare makan mera
sham ko KHud hi DhunDhta hai mujhe
rat-jago tum hi kuchh batao ab
ishq to hai hi aur kya hai mujhe
main bhi kya dusron ke jaisa hun
KHud ko bahar se dekhna hai mujhe
baat sach hai magar kahun kaise
tishnagi ne Dubo diya hai mujhe
mauj-dar-mauj miT raha hun main
kaun sahil pe likh gaya hai mujhe
kis liye rose jag jata hun
kaun hai jis ka Dar laga hai mujhe
Ghazal
Tujhko dekha to ye laga hai mujhe
Imran Husain Azad