teri nisbat se apni zat ka idrak karne mein
bahut arsa laga hai pairahan ko chaak karne mein
teri basti ke bashinde bahut aasuda-KHatir hain
takalluf ho raha hai dard ko poshak karne mein
hum apne jism ka sona safar par le ke nikle hain
magar Darte hain is ko raston ki KHak karne mein
faqat ek dida-e-tar hai ki jo sairab karta hai
samundar sukh jate hain badan namnak karne mein
hamare sath kuchh guzre hue mausam bhi shamil hain
tamasha-gah-e-alam tujh ko ibrat-nak karne mein
Ghazal
Teri nisbat se apni zat ka idrak karne mein
Obaid Siddiqi