teri jaanib se dil mein waswase hain
ye kutte raat bhar bhonka kiye hain
libas-e-dard bhi hum ne utara
ye kapDe ab purane ho chuke hain
utaren kenchuli ab talKH jazbaat
ki wo apne mein ghuT kar rah gae hain
na ho mayus KHushk aaankhon se ai dil
ki sahraon mein bhi dariya bahe hain
'salim' achchhi ghazal hai teri mana
magar ye phul ghure par khile hain
Ghazal
Teri jaanib se dil mein waswase hain
Saleem Ahmed