tilism hai ki tamasha hai kaenat us ki
charagh-e-hijr se raushan rahegi raat us ki
zamin ho ki zaman sab usi ke mohre hain
bichhi hui hai bahut dur tak bisat us ki
hamare sath bhi hote hain tajrabe us ke
hamare haal mein shamil hai wardat us ki
shikast o fath mein kya farq hai nahin malum
ye kya ki jit hamari hai aur mat us ki
use KHamosh bhi rahna tha ek pal ke liye
samajh saka na koi anjuman mein baat us ki
idhar ye nind udhar jagte hue sae
ajib silsila-e-KHwab hai hayat us ki
Ghazal
Tilism hai ki tamasha hai kaenat uski
Shamim Hanafi