tirgi taq mein jaDi hui hai
dhup dahliz par paDi hui hai
dil pe nakaamiyon ke hain paiwand
aas ki soi bhi gaDi hui hai
mere jaisi hai meri parchhain
dhup mein pal ke ye baDi hui hai
gher rakkha hai na-rasai ne
aur KHwahish wahin khaDi hui hai
main ne taswir phenk di hai magar
kil diwar mein gaDi hui hai
haarta bhi nahin gham-e-dauran
zid pe ummid bhi aDi hui hai
dil kisi ke KHayal mein hai gum
raat ko KHwab ki paDi hui hai
Ghazal
Tirgi taq mein jaDi hui hai
Ammar Iqbal