tir pahlu mein nahin ai rufaqa-e-parwaz
tair-e-jaan ke ye par hain barae parwaz
yun to par-band hun par yar paron par mere
jo girah teri hai so uqda-kusha-e-parwaz
ek parwaz ki taqat nahin us ja se mujhe
aur jo hukm ho sayyaad siwae parwaz
dekhiyo nama na laya ho kabutar is ka
kuchh mere kan mein aati hai sada-e-parwaz
be-par-o-baali pe ghash hun ki ye har dam hai rafiq
thi par-o-baal hi tak hum se wafa-e-parwaz
apne nazdik to is dam mein phans kar sayyaad
kisi kam-baKHt ko howega hawa-e-parwaz
to bhi us tak hai rasai mujhe 'ehsan' dushwar
dam lun gar par-e-jibril bara-e-parwaz
Ghazal
Tir pahlu mein nahin ai rufaqa-e-parwaz
Abdul Rahman Ehsan Dehlvi