Thikane yun to hazaron tere jahan mein the

Thikane yun to hazaron tere jahan mein the
koi sada hamein rokegi is guman mein the

ajib basti thi chehre to apne jaise the
magar sahife kisi ajnabi zaban mein the

bahut KHushi hui tarkash ke KHali hone par
zara jo ghaur kiya tir sab kaman mein the

ilaj DhunDh nikalenge apni wahshat ka
junun-nawaz abhi tak isi guman mein the

hum ek aisi jagah ja ke lauT kyun aae
jahan suna hai ki sab aaKHiri zaman mein the