thi jis ki justuju wo haqiqat nahin mili
in bastiyon mein hum ko rifaqat nahin mili
ab tak hain is guman mein ki hum bhi hain dahr mein
is wahm se najat ki surat nahin mili
rahna tha us ke sath bahut der tak magar
in roz o shab mein mujh ko ye fursat nahin mili
kahna tha jis ko us se kisi waqt mein mujhe
is baat ke kalam ki mohlat nahin mili
kuchh din ke baad us se juda ho gae 'munir'
us bewafa se apni tabiat nahin mili
Ghazal
Thi jis ki justuju wo haqiqat nahin mili
Muneer Niyazi