thake logon ko majburi mein chalte dekh leta hun
main bas ki khiDkiyon se ye tamashe dekh leta hun
kabhi dil mein udasi ho to un mein ja nikalta hun
purane doston ko chup se baiThe dekh leta hun
chhupate hain bahut wo garmi-e-dil ko magar main bhi
gul-e-ruKH par uDi rangat ke chhinTe dekh leta hun
khaDa hun yun kisi KHali qile ke sehn-e-viran mein
ki jaise main zaminon mein dafine dekh leta hun
'munir' andaza-e-qar-e-fana karna ho jab mujh ko
kisi unchi jagah se jhuk ke niche dekh leta hun
Ghazal
Thake logon ko majburi mein chalte dekh leta hun
Muneer Niyazi