Teri naraazgi fasl-e-KHizan hai

teri naraazgi fasl-e-KHizan hai
rifaqat gulistan hi gulistan hai

hui hai war par jis ki samaat
hadis-e-ishq aisi dastan hai

yaqinan inqalab aaya hai koi
hamara zikr aur un ki zaban hai

ghamon ka zang jo dil se miTa de
wo dilkash aap ka tarz-e-bayan hai

mujhe mauj-e-hawadis ka nahin Dar
safina ki mere himmat jawan hai

watan ke rahnuma se puchhta hun
wo rahzan hai ki mir-e-karwan hai