teri aankhon mein jo nasha hai pazirai ka
rang bhar de na meri zist mein ruswai ka
tujh ko afsun-e-mohabbat ki zarurat kya thi
sehr kuchh kam to nahin tha teri ranai ka
dil to kya chiz hai jaan us pe tasadduq kar dun
ye agar arbada bhi ho kisi harjai ka
sochta hun dil-e-betab pe kya guzregi
samna ho gaya gar phir shab-e-tanhai ka
kahin aisa na ho is lutf-o-mudaraat ke baad
imtihan ho mere pindar-e-shakebai ka
Ghazal
Teri aankhon mein jo nasha hai pazirai ka
Gopal Mittal