tere jalwon ko ru-ba-ru kar ke
tujh se milte hain hum wuzu kar ke
tere kuche se lauT aae hum
apni aankhen lahu lahu kar ke
chaak-daman hai chaak rahne de
kya karega use rafu kar ke
tere lahje mein kaisa jadu hai
hum bhi dekhenge guftugu kar ke
apni duniya luTae baiTha hun
ye mila teri justuju kar ke
kho diya hai charagh bhi 'afzal'
chand taron ki aarzu kar ke
Ghazal
Tere jalwon ko ru-ba-ru kar ke
Afzal Allahabadi