tark-e-ulfat ka irada bhi nahin
un se izhaar tamanna bhi nahin
waqt kaTta hi na tha jis ke baghair
us ko muddat hui dekha bhi nahin
jaisi guzri hai ghanimat hai magar
zindagi tera bharosa bhi nahin
dil mein rakhta hai bahut kuchh lekin
baat kahne ki wo kahta bhi nahin
KHub saj-dhaj hai tumhaari phir bhi
dekhna kaisa wo takta bhi nahin
ghur kar dekhta rahta hai mujhe
main ne us ko kabhi dekha bhi nahin
baaten karta hai musalsal 'kausar'
rose milta hai shanasa bhi nahin
Ghazal
Tark-e-ulfat ka irada bhi nahin
Maher Chand Kausar