taras raha hun adam aarmida KHushbu ko
kahan se DhunD ke laun ramida aahu ko
zahe-nasib ki taskin de raha hai aaj
tumhaara husn mere ishq-e-sar-ba-zanu ko
chamak raha hai teri rah mein teri KHatir
hai intizar tera har diye ko jugnu ko
sitam ki ahl-e-mohabbat bhi rah gae nakaam
samajh na pae jamal-e-hazar-pahlu ko
utara umr-e-gurezan ke raste jogi ne
hamare sar se kai joginon ke jadu ko
hazar hile bahane se 'krishn-mohan' ne
shikar-e-shauq kiya hai nigar-e-dil-ju ko
Ghazal
Taras raha hun adam aarmida KHushbu ko
Krishna Mohan