taqsir kya hai hasrat-e-didar hi to hai
padash us ki husn ka pindar hi to hai
kya puchhte ho mera fasana naya nahin
kya dekhte ho ishq sar-e-dar hi to hai
band-e-qaba chaTakta hua ghuncha-e-gulab
pahlu-e-yar nikhat-e-gulzar hi to hai
ham-saegi mein us ki hai kya lutf in dinon
lekin ye lutf-e-saya-e-diwar hi to hai
ai baghban ba-nam-e-bahaaran na chheD use
gulzar mein muhafiz-e-gul KHar hi to hai
saz-e-hayat ham-nafaso KHub hai magar
kab TuT jae sans ka ek tar hi to hai
main tang hun sukun se ab iztirab de
be-intiha sukun bhi aazar hi to hai
KHud jis mein kuchh na paya na auron ko kuchh diya
fil-asl aisi zindagi bekar hi to hai
Ghazal
Taqsir kya hai hasrat-e-didar hi to hai
Wamiq Jaunpuri