tan-e-be-jaan mein ab raha kya hai
dekhiye marzi-e-KHuda kya hai
apni haalat pe aaj rota hai
dil-e-diwana ko hua kya hai
ai tabibo tumhein KHuda ki qasam
sach bata do ki majra kya hai
main KHatawar hi sahi lekin
sun to lo pahle majra kya hai
na khula aaj tak kisi par bhi
KHat-e-taqdir mein likha kya hai
kyun ye chup chup gae adam wale
ya-ilahi ye majra kya hai
lab-e-zaKHm-e-jigar to hanste hain
tu ne ai baKHiya-gar siya kya hai
dil to kya jaan ishq mein de di
ye na puchha ki muddaa kya hai
uTh ke pichhle se aahon ka bharna
'shauq' tera ye mashghala kya hai
Ghazal
Tan-e-be-jaan mein ab raha kya hai
Pandit Jagmohan Nath Raina Shauq