tamam husn-o-maani ka rang uDne laga
khili jo dhup to pani ka rang uDne laga
ishaara karti hain chehre ki jhurriyan chup-chap
to kya badan se jawani ka rang uDne laga
jadid rang mein aaya jo misra-e-ula
hasad se misra-e-sani ka rang uDne laga
kitab-e-zist ke mafhum ko samajhte hi
yahan baDe baDe gyani ka rang uDne laga
jo daimi tha wahi rah gaya hai zehnon mein
jo aarzi tha kahani ka rang uDne laga
meri nazar se mili 'faiz' jab nazar us ki
to mere dushman-e-jaani ka rang uDne laga
Ghazal
Tamam husn-o-maani ka rang uDne laga
Faiz Khalilabadi