talab se bhi kuchh aur ziyaada mila
badan par ghamon ka labaada mila
mujhe har jagah sarfaraazi mili
ki gham ka mujhe shahzada mila
bahut sadgi us ke bachpan mein thi
jawani ka qissa bhi sada mila
ki be-saz-o-saman tha is liye
mujhe har safar be-irada mila
zamin par tu sau aasman oDh le
makan tujh ko kitna kushada mila
rag-e-sang jab bhi nichoDi gai
gulon ka lahu taza taza mila
hansi ko taraste hue lab mile
har ek shakl par gham ka ghaza mila
Ghazal
Talab se bhi kuchh aur ziyaada mila
Muneer Saifi