tah-ba-tah dariya ke sab asrar tak wo le gaya
lahr ek is par se us par tak wo le gaya
kaisa saya tha ki gul ki us ne sari raushni
sath apne dhund ki diwar tak wo le gaya
ek tha bimar qaidi ek gawah-e-chashm-did
ek hi zanjir ko darbar tak wo le gaya
tha charagh-e-iltija lekin bujha is shan se
har muKHatib se lab-e-izhaar tak wo le gaya
har sadaf mein nur ki thi bund sharmai hui
KHalwaton se khinch kar bazar tak wo le gaya
Ghazal
Tah-ba-tah dariya ke sab asrar tak wo le gaya
Musavvir Sabzwari