ta-ba-kai manzil-ba-manzil hum musafir bhagte
aankh ab Thahri hui hai aur manazir bhagte
ai harif-e-har-qadam shah-mat se bachne ki soch
is bisat-e-KHak se kya hum se shatir bhagte
hum to aae hain yahan miTne miTane ke liye
is zamin-e-karbala se kis ki KHatir bhagte
bas mein aa jaane ka jazba bas mein karne ki hawas
KHak-o-baad-o-ab-o-atish bhi hain qasir bhagte
sar kahin panw kahin aankhen kahin chehra kahin
is hawas mein kho gai pahchan aaKHir bhagte
'KHair' shab-KHun mar kar chhup jaane wale hum nahin
marka sar karne nikle hain to kya phir bhagte
khod lete hain kuan shahdab pa lete hain 'KHair'
is zamin-e-saKHt se kya hum se shair bhagte
Ghazal
Ta-ba-kai manzil-ba-manzil hum musafir bhagte
Rauf Khair