Sunata hai koi bholi kahani

sunata hai koi bholi kahani
mahakte miThe dariyaon ka pani

yahan jangal the aabaadi se pahle
suna hai main ne logon ki zabani

yahan ek shahar tha shahr-e-nigaran
na chhoDi waqt ne is ki nishani

main wo dil hun dabistan-e-alam ka
jise roegi barson shadmani

tahayyur ne use dekha hai akasr
KHirad kahti hai jis ko la-makani

KHayalon hi mein akasr baiThe baiThe
basa leta hun ek duniya suhani

hujum-e-nashsha-e-fikr-e-suKHan mein
badal jate hain lafzon ke maani

bata ai zulmat-e-sahra-e-imkan
kahan hoga mere KHwabon ka sani

andheri sham ke pardon mein chhup kar
kise roti hai chashmon ki rawani

kiran pariyan utarti hain kahan se
kahan jate hain riste kahkashani

pahaDon se chali phir koi aandhi
uDe jate hain auraq-e-KHizani

nai duniya ke hangamon mein 'nasir'
dabi jati hain aawazen purani