soz-e-parwana nur-e-din-e-shama
tar-e-zunnar dil-nashin-e-shama
qatra-e-KHun-e-zaKHm-e-parwana
qashqa-e-taza-e-jabin-e-shama
tum bhi do ek bosa bahr-e-KHuda
ki hai gul-gir bosa-chin-e-shama
dana-e-ishq bo raha hai patang
soKHta garche hai zamin-e-shama
meri arz-e-hayat ka hai tul
nafas-e-tang wapsin-e-shama
aah parwane ka pareshan dud
ban gaya zulf-e-ambarin-e-shama
qadr-e-majnun na hogi mere baad
KHak jugnu ho ja-nashin-e-shama
roz-e-awwal se hain baham marbut
dast-e-parwana aastin-e-shama
haq mein parwane ke hai tir-e-shahab
ai 'waqar' aah-e-atishin-e-shama
Ghazal
Soz-e-parwana nur-e-din-e-shama
Kishan Kumaar Waqaar