sohbat-e-mai-kashi sarsari rah gai
aur jo mina bhari thi bhari rah gai
kya ghazab hai nasheman sulagta raha
aur shaKH-e-nasheman hari rah gai
aaKHirash kaam aa hi gai KHamushi
lafz-o-mani ki parda-dari rah gai
har nazar ban gai apne sine ka tir
ek KHalish ban ke dida-dari rah gai
nasl-e-adam se itne uThe kirdgar
apne lab si ke paighambari rah gai
aadmi ka KHuda ban gaya aadmi
dawar-e-hashr ki dawari rah gai
mera har naqsh-e-pa ban gaya sang-e-mil
KHizar ki zahmat-e-rahbari rah gai
'shor' daman-e-gham ho gaya tar tar
har masarrat ki baKHiya-gari rah gai
Ghazal
Sohbat-e-mai-kashi sarsari rah gai
Manzoor Husain shor