sochta hai kis liye tu mere yar de mujhe
thak chuka hun nafraton se thoDa pyar de mujhe
kaun hun mujhe to apna nam bhi pata nahin
koi mera nam le ke phir pukar de mujhe
in KHirad ki hila-saziyon se tu aman de
daftar-e-junun mein koi karobar de mujhe
aaj apne hi muqable pe DaT gaya hun main
tegh koi bhej koi rahwar de mujhe
is ana ki jang mein tu fath-yab kar mujhe
ye sharaf bhi aaj mere shahsawar de mujhe
kuchh KHabar to de mere musafiron ki a saba
kuchh nishan-e-kucha-ha-e-be-dayar de mujhe
TuT kar bikharta ja raha hun is tarah se main
kash koi hath baDh ke phir sanwar de mujhe
'shahid'-e-nawa-e-asr ke suKHan ki qadr kar
lahja-e-sukut harf-e-e'tibar de mujhe
Ghazal
Sochta hai kis liye tu mere yar de mujhe
Shahid Kamal