sirf sach aur jhuT ki mizan mein rakkhe rahe
hum bahadur the magar maidan mein rakkhe rahe
jugnuon ne phir andheron se laDai jit li
chand suraj ghar ke raushan-dan mein rakkhe rahe
dhire dhire sari kirnen KHud-kushi karne lagin
hum sahifa the magar juzdan mein rakkhe rahe
band kamre khol kar sachchaiyan rahne lagin
KHwab kachchi dhup the dalan mein rakkhe rahe
sirf itna fasla hai zindagi se maut ka
shaKH se toDe gae gul-dan mein rakkhe rahe
zindagi bhar apni gungi dhaDkanon ke sath sath
hum bhi ghar ke qimti saman mein rakkhe rahe
Ghazal
Sirf sach aur jhuT ki mizan mein rakkhe rahe
Rahat Indori