Sikha diya hai zamane ne be-basar rahna

sikha diya hai zamane ne be-basar rahna
KHabar ki aanch mein jal kar bhi be-KHabar rahna

sahar ki os se kahna ki ek pal to ruke
ki na-pasand hai hum ko bhi KHak par rahna

tamam umr hi guzri hai dastaken sunte
hamein to ras na aaya KHud apne ghar rahna

wo KHush-kalam hai aisa ki us ke pas hamein
tawil rahna bhi lagta hai muKHtasar rahna

safar aziz hawa ko magar aziz hamein
misal-e-nikhat-e-gul us ka ham-safar rahna

shajar pe phul to aate rahe bahut lekin
samajh mein aa na saka us ka be-samar rahna

ajib tarz-e-takallum hai us ki aankhon ka
KHamosh rah ke bhi lafzon ki dhaar par rahna

waraq waraq na sahi umr-e-raegan meri
hawa ke sath magar tum na umr bhar rahna

zara si Thes lagi aur ghar ko oDh liya
kahan gaya wo tumhaara nagar nagar rahna