sidrat-ul-wasl ke sae ka talabgar hun main
tapish-e-hijr mein barson se giraftar hun main
ja kisi aur ko ja dhamkiyan de marne ki
jab se main paida hua tab se sar-e-dar hun main
mera paigham bhala tegh kahan rokegi
hakim-e-waqt ko batlao qalam-kar hun main
main ne to rab ko bhi puja hai aur us yar ko bhi
waiza tu hi bata kis ka gunahgar hun main
manzil-e-zist kahan manzil-e-maqsud 'waqar'
ek surayya-e-mohabbat ka talabgar hun main
Ghazal
Sidrat-ul-wasl ke sae ka talabgar hun main
Waqar Khan