Shuru-e-ishq mein logon ne itni shiddat ki

shuru-e-ishq mein logon ne itni shiddat ki
ki rafta rafta kami ho gai mohabbat ki

ye kargah-e-zehanat hai is mein chhoTe kya
baDe-baDon ne yahan par baDi himaqat ki

jahan se ilm ka hum ko ghurur hota hai
wahin se hoti hai bas ibtida jahaalat ki

jo aadmi hai talash-e-sakun mein sadiyon se
usi ne kar di yahan intiha bhi wahshat ki

purane logon ko har daur mein raha shikwa
nae dimaghon ne har ahd mein baghawat ki

dikhai deta nahin apna mom ho jaana
shikayaten hain hamein dhup se tamazat ki

isi liye to andhere mein aaj baiThe hain
ki hum ne apne charaghon ki kab hifazat ki