shor mein irtikaz milta hai
tab kahin ja ke raaz milta hai
gunj uThti hai dur tak aawaz
soz se jaise saz milta hai
aap hi aap hath malte hue
zindagi ka jawaz milta hai
KHwab milte hain maKHmalin kis ko
kis ko bistar gudaz milta hai
kis se hoti hain raaz ki baaten
kis ko wo be-niyaz milta hai
dekhiye kaun si hawaon mein
wo hawai-jahaz milta hai
Ghazal
Shor mein irtikaz milta hai
Imran Shamshad