shikasta-par junun ko aazmaenge nahin kya
uDanon ke liye par phaDphaDaenge nahin kya
hawaen mehrban thin muntaqim kyun ho gai hain
nigah-waran-e-sahil kuchh bataenge nahin kya
koi hansta hua suraj pas-e-diwar-e-tarik
firozan ho to diwaren giraenge nahin kya
wahi pahli si arzani sar-e-bazar-e-pindar
nazar aae to hum qimat baDhaenge nahin kya
sawad-e-tishnagi ke par ek mawwaj dariya
ghazal-KHwan ho to phir teshe uThaenge nahin kya
badalte mausamon ki dhul hote raston ko
thake-haare musafir yaad aaenge nahin kya
Ghazal
Shikasta-par junun ko aazmaenge nahin kya
Iftikhar Arif