shikasta KHwab mere aaine mein rakkhe hain
ye kya azab mere aaine mein rakkhe hain
abhi to ishq ki parten khulengi tah-dar-tah
abhi hijab mere aaine mein rakkhe hain
paDha rahe ho mujhe tum ye kis jahan ke sabaq
mere nisab mere aaine mein rakkhe hain
tumhaare KHwab salamat hain ujDi aankhon mein
jo zer-e-ab mere aaine mein rakkhe hain
tumhaare hijr mein guzre hue sabhi lamhe
meri kitab mere aaine mein rakkhe hain
Ghazal
Shikasta KHwab mere aaine mein rakkhe hain
Zubair Qaisar