sharm-alud kahin dida-e-ghammaz na ho
dilbari ka koi pahlu nazar-andaz na ho
dur se dard-bhari ek sada aati hai
mere TuTe hue dil ki kahin aawaz na ho
lazzat-e-dard ka mahjur sahaara kyun len
lutf-e-tanhai to jab hai koi dam-saz na ho
shukr sad shukr ki ai shauq mera tair-e-dil
baal-o-par hote hue mail-e-parwaz na ho
muntazir bazm hai aa jaen ba-sad ishwa-e-naz
shart ye hai ki nigah-e-ghalat-andaz na ho
ye bhi kya daur hai nairangi-e-alam tera
murgh-e-asuda chaman zamzama-e-parwaz na ho
kasrat-e-jalwa mein gum hai dil hangama-faroz
be-KHudi kahti hai mera koi hamraaz na ho
sar-e-maqtal koi is shan se aae ai 'shauq'
lab pe eajaz na ho chashm fusun-saz na ho
Ghazal
Sharm-alud kahin dida-e-ghammaz na ho
Pandit Jagmohan Nath Raina Shauq