shahr mein aa hi gae hain to guzara kar len
ab bahar-haal har ek shai ko gawara kar len
DhunDte hi rahe ghar mein koi khiDki na mili
hum ne chaha jo kabhi un ka nazara kar len
apni tanhai ka ehsas adhura hai abhi
aaina toD den sae se kinara kar len
apne jalte hue ehsas mein tapte tapte
mom ban jaen ya apne ko sharara kar len
zindagi tum se ibarat hai meri jaan lekin
phir bhi hasrat hai yahi zikr tumhaara kar len
Ghazal
Shahr mein aa hi gae hain to guzara kar len
Shamim Abbas