shahar KHamosh hai sab neza-o-KHanjar chup hain
kaisi uftad paDi hai ki sitamgar chup hain
KHun ka sailab tha jo sar se abhi guzra hai
baam-o-dar ab bhi sisakte hain magar ghar chup hain
chaar-su dasht mein phaila hai udasi ka dhuan
phul sahme hain hawa Thahri hai manzar chup hain
mutmain koi nahin nama-e-amal se aaj
muskuraata hai KHuda sare payambar chup hain
lauT ke aati nahin ab to sada-e-gumbad
chup hain sab dair-o-haram masnad-o-mimbar chup hain
main jo KHamosh tha ek shor tha har mahfil mein
meri goyai par ab sare suKHnawar chup hain
Ghazal
Shahar KHamosh hai sab neza-o-KHanjar chup hain
Shahid Mahuli