shab-e-wasl kya muKHtasar ho gai
zara aankh jhapki sahar ho gai
nigahon ne sab raaz-e-dil kah diya
unhen aaj apni KHabar ho gai
baDi chiz hai tarz-e-beganagi
ye tarkib agar kargar ho gai
ilahi bura ho gham-e-ishq ka
suna hai ki un ko KHabar ho gai
kiye mujh pe ehsan gham-e-yar ne
hamesha ko nichi nazar ho gai
numayan hui subh-e-piri 'jigar'
bas ab dastan muKHtasar ho gai
Ghazal
Shab-e-wasl kya muKHtasar ho gai
Jigar Moradabadi