Shana to chhuTa zulf-e-pareshan se ulajh kar

shana to chhuTa zulf-e-pareshan se ulajh kar
suljha na ye dil kakul-e-pechan se ulajh kar

leta hai KHabar kaun asiran-e-bala ki
mar mar gae tariki-e-zindan se ulajh kar

zoron pe chaDha hai ye mera panja-e-wahshat
daman se ulajhta hai gareban se ulajh kar

diwane KHat-o-zulf ke saude ki lahar mein
kya kya na bake sumbul-o-raihan se ulajh kar

aasar-e-qayamat kahin jaldi ho numayan
ghabrae hai ji ab shab-e-hijran se ulajh kar

Darta hun kahin tab nazakat se na khawe
mu-e-kamar us zulf-e-pareshan se ulajh kar

sau pech mein aaya hai hamara dil-e-sad-chaak
shana ki tarah kakul-e-pechan se ulajh kar

girdab-e-bala mein dil-e-ashiq ko phansaya
baali ne teri zulf-e-pareshan se ulajh kar

tai kar gae sab kaba-e-maqsud ki manzil
ek rah gae hum naKHl-e-mughilan se ulajh kar

dauDa hua jata hai raqib us ki gali ko
yarab ye gire raste mein daman se ulajh kar

jazb-e-dil-e-majnun ne kiya kaam jo apna
naqa na ruka KHar-e-bayaban se ulajh kar

yarab main use dekhun agar dida-e-bad se
rah jae nazar panja-e-mizhgan se ulajh kar

ai tir-fagan bas hai yahi mujh ko tamanna
chhuTe na rag-e-jaan tere paikan se ulajh kar

mat bahs raqiban-e-kaj-andesh se 'ghafil'
be-qadr na ho aise safihan se ulajh kar