sham se pahle ghar gae hote
ya sar-e-sham mar gae hote
is gadayana zindagi se to
waza-darana mar gae hote
yun bhi ek umr raegan guzri
yun bhi kuchh din guzar gae hote
tu jo dil se utar gaya hota
zaKHm dil ke ubhar gae hote
hum na hote to hadsat-e-jahan
jaane kis kis ke sar gae hote
koi daman-kash-e-KHayal na tha
warna hum bhi Thahar gae hote
sham-e-mahfil na the ki mahfil mein
le ke hum zaKHm-e-sar gae hote
Ghazal
Sham se pahle ghar gae hote
Rasa Chughtai